ამბების კითხვა და სიმღერა

შექმენით ამბებით და სიმღერებით სავსე სამყარო

• განაგრძეთ ხარისხიანი წიგნების ძიება, ილუსტრაციებით და ცხოვრებისეული ამბებით.
• ეძებეთ წიგნები, რომლებიც დაეხმარება თქვენს შვილს "ენობრივი აფეთქების" პერიოდში. თუ სამუშაო იარაღები აინტერესებს, უჩვენეთ რეალური ინსტრუმენტები - ჩაქუჩი, სახრახნისი, სასვრეტელა - და მოძებნეთ წიგნები იარაღების ფერადი გამოსახულებით, ან წიგნი დურგალზე.
• წიგნები გამოსახსნელი და მოცულობითი ნახატებით ძალიან მოსწონთ ამ ასაკის ბავშვებს და იდეალურია, როცა წიგნში გამოყენებული სიტყვების განხილვა გვსურს.
• ამ ასაკში ბავშვებს კვლავ აინტერესებთ ამბები ნაცნობი სიტუაციებით, თუმცა უკვე უჩნდებათ ინტერესი იმ ნახატების მიმართ, რომლებიც სავსეა ინფორმაციით, მოქმედებით და წვრილმანებით.
• მოძებნეთ სიმღერები უფრო რთული ტექსტით და სტრუქტურით. ბავშვი ამ ეტაპზე უფრო მეტ სიტყვას ითვისებს, ამიტომ განაგრძეთ მისი შიმშილის დაკმაყოფილება და სულ უფრო რთული სიმღერები შესთავაზეთ.
• ამ ასაკში განსაკუთრებით კარგია წიგნები, რომლებშიც არის საბავშვო სიმღერები მისამღერებით, ხმოვანი ეფექტებით ან ქმედებებით, რომელთა გამეორებაც შეიძლება.
• წიგნები, რომლებშიც არის რითმები, რიტმი და გამეორებები, ბავშვის გრამატიკულ მეტყველებას ავითარებს.

დაეხმარეთ ბავშვს, დაუკავშირდეს ამბებს და სიმღერებს

• როცა ბავშვი უკვე იცნობს წიგნს, შეგიძლიათ ესაუბროთ იქ გადმოცემული ამბების, მოთხრობებისა და ზღაპრების გმირებზე ან მოვლენებზე და წიგნში მომხდარი თქვენი შვილის გამოცდილებას შეადაროთ.
• როცა კითხულობთ წიგნს ადვილად გასაგები ამბებით, სადაც ტექსტი მეორდება და ნახატებიც შესაბამისია, გააკეთეთ პაუზა ხმამაღლა კითხვისას, რათა ბავშვმა შეძლოს სიტყვის ან ფრაზის ჩასმა.
• მოიფიქრეთ მოძრაობები თქვენი შვილის საყვარელი სიმღერებისთვის, რათა ისინი ერთად შეასრულოთ. მოქმედებები ბავშვს დაეხმარება სიტყვების მნიშვნელობების გაგებასა და ინტერპრეტირებაში.

გამოყავით დრო ბავშვთან ერთად საკითხავად და სამღერად

• განაგრძეთ სივრცისა და დროის გამოყოფა ბავშვთან ერთად სიმღერისა და კითხვისთვის, რეგულარული ყოველდღიური აქტივობის სახით და როგორც ძილისთვის მოსამზადებელი პროცესის აქტიური ნაწილი. მშვიდად უამბეთ რაიმე, საღამოს მის საწოლზე წამოწოლილმა - ეს შესანიშნავი ხერხია, დაძინებაში დაეხმაროთ და თან დღის დასასრულის სიგნალია.